भारत सरकारको सहयोगमा धनुषा जिल्लामा एक विद्यालयको भवन निर्माण

कार्तिक २५,काठमाडौँ । भारत सरकारले धनुषा जिल्लामा एक विद्यालयको भवन निर्माण गरेको छ। भारतले दुई करोड ६२ लाख चार हजारको आर्थिक सहयोगमा धनुषाको कुम्हरौडास्थित श्री लक्ष्मीनियाँ जनता माध्यमिक विद्यालयको नवनिर्मित विद्यालय भवन निर्माण गरेको हो।

उक्त भवनको काठमाडौंस्थित भारतीय राजदूतावास, शहरी विकास तथा भवन निर्माण विभाग, संघीय परियोजना कार्यान्वयन इकाई, धनुषा जनकपुरधाम तथा विद्यालय व्यवस्थापन समितिका प्रतिनिधिहरु र स्थानीय प्रतिनिधिहरुद्वारा सोमबार संयुक्त रुपमा उद्घाटन गरिएको दूतावासले प्रेस विज्ञप्ति जारी गरी जनाएको छ।

‘नेपाल–भारत विकास सहकार्य’कार्यक्रम अन्तर्गत भारत सरकारको अनुदान सहयोगमा १५ वटा कक्षाकोठा र सरसफाई सुविधा सहितको उक्त तीनतल्ले विद्यालय भवनको निर्माण भएको हो। भारत सरकार र नेपाल सरकारबीच भएको सम्झौता अन्तर्गत यस परियोजनालाई उच्च प्रभाव सामुदायिक विकास परियोजनाको रुपमा विकास गरिएको हो।

भारतले हालसम्म नेपालमा ४ सय २४ उच्चप्रभाव सामुदायिक विकास परियोजनाहरु सम्पन्न गरिसकेको जनाएको छ। धनुषामा १० वटा गरी प्रदेश नं २ मा ४५ वटा परियोजनाहरु सम्पन्न भइसकेको दूतावासले जनाएको छ। धनुषा जिल्लामा ९ वटा समेत गरी प्रदेश नं २ मा भारत सरकारको अनुदानमा सञ्चालित २१ परियोजनाहरु सम्पन्न तथा कार्यान्वयनका विभिन्न चरणहरुमा रहेका छन्।

धनुषाको तुलसियाहीमा वैद्यनाथ देवनारायण जनता उच्च माध्यमिक विद्यालयको निर्माणार्थ मिति २०७६ चैत ३ गते सम्झौतापत्रमा हस्ताक्षर भएको छ। नेपाल सरकारले मुखियापट्टी मुसरनिया गाउँपालिकालाई कार्यान्वयन निकायको रुपमा नियुक्त गरेको छ भने टेन्डर प्रक्रिया पूरा गर्न बाँकी रहेको छ।

धनुषा जिल्लाको कुम्हरौडास्थित श्री लक्ष्मीनियाँ जनता माध्यमिक विद्यालय सन् १९५६ मा स्थापना भएको हो। विद्यालयमा करिब ११०७ जना विद्यार्थीहरु अध्ययनरत छन् जसमध्ये ५० प्रतिशतभन्दा बढी छात्रा रहेका छन्।

यस नवनिर्मित संरचनाले विद्यार्थीहरुको सिकाई वातावरणलाई सुदृढ गर्ने अपेक्षा गरिएको छ। यस परियोजनाले नेपाल र भारत बीचको विकास साझेदारीलाई प्रतिबिम्बित गर्नुका साथै शिक्षाको क्षेत्रमा पूर्वाधार अभिवृद्धि गर्न नेपाल सरकारले गरेको प्रयासलाई थप बल पुर्‍याएको छ।

(Visited 1 times, 1 visits today)

Related posts

तपाइलाइ कस्ताे लाग्याे ?