पुस २२, काठमाडौ । मन्त्रिपरिषद्को निर्णयले नगर विकास कोषमा रिक्त ७ जना बोर्ड सदस्य चयन गर्ने निर्णय गरेको छ । जसमा बागमती प्रदेश अन्तर्गत धुनिवेशी नगरपालिका प्रमुख बालकृष्ण आचार्यसहित प्रदेश १ बाट त्रियुगा नगरपालिका प्रमुख बलदेव चौधरी, प्रदेश २ बाट क्षिरेश्वर नगरपालिका उपप्रमुख रचना श्रेष्ठ, गण्डकी प्रदेशबाट गोरखा नगरपालिका प्रमुख राजनराज पन्त, लुम्बिनी प्रदेशबाट रेसुङ्गा नगरपालिका प्रमुख डिल्लीराज भुषाल, कर्णाली प्रदेशबाट रास्कोट नगरपालिका उपप्रमुख मिमसरा बम, सुदुरपश्चिम प्रदेशबाट गोदावरी नगरपालिका उपप्रमुख रत्नाम कडायतलाई बोर्ड सदस्यमा नियुक्त गर्ने निर्णय गरेको हो ।
कोषमा केही समयदेखि नगरपालिकाबाट प्रतिनिधित्व हुने पद खाली रहेको थियो । नगर विकास कोषमा अध्यक्षसहित जम्मा १६ जना सदस्यको बोर्ड रहने गर्दछ । शहरी विकास मन्त्रालयका सचिव अध्यक्ष रहने बोर्डमा नगरप्रमुख/उपप्रमुख गरी ७ जना,शहरी विकास मन्त्रालयको तर्फबाट ३ जना सदस्य रहने व्यवस्था रहेको छ ।
सदस्य सचिव कार्यकारी निर्देशक रहने व्यवस्था रहेको छ । जसमा कृष्ण सापकोटाले काम गर्दै आइरहेका छन् । त्यस्तै संघिय मामिला मन्त्रालयबाट १ सहसचिव र अर्थ मन्त्तालयबाट १ सहसचिव र २ जना बोर्डले नियुक्त गर्ने विज्ञ रहने व्यवस्था रहेको छ । नगर विकास कोषले देशभरी रहेका नगरपालिकासंग सहकार्य गर्दै विभिन्न योजनामा ऋण सम्झौता गर्ने गर्दछ ।
