साउन २, काठमाण्डौ । अनाधिकृत व्यक्तिलाई बजेट निमार्णमा संलग्न गराएर करको दायरा हेरफेर गरेको विषयमा छानबिन गर्न गठित छानबिन समितिले आज अर्थ मन्त्रालयको ‘हार्डडिस्क’ अध्ययन गर्ने भएको छ । जेठ महिनाको सिसिटिभी फुटेज डिलिट भयो भनेर अर्थ मन्त्रालयले समितिलाई सिसिटिभी फुटेज दिन आनाकानी गरेपछि हार्डडिस्क मगाएर समितिले अध्ययन गर्न लागेको हो ।
‘जेठ महिनाको सिसिटिभी फुटेजको हार्डडिस्क मगाएका छौँ, त्यो प्राप्त भयो भने प्रावधिक राखेर अध्ययन गर्नेछौं,’ समिति सदस्य लक्ष्मणलाल कर्णले भने । उनका अनुसार हिजो राति ८ बजेसम्म पनि समितिले सो प्रकरणका बारेमा सरोकारवाला व्यक्तिसँग बयान, छानविन र अध्ययन गरेको थियो ।