हप्तादिनमै वाणिज्य बैंकहरुको निक्षेप ११ अर्बले बढ्यो

भाद्र २०,काठमाडौँ । पछिल्लो साता वाणिज्य बैंकहरुको निक्षेप ११ अर्बले बढेको छ । नेपाल बैंकर्स संघको रिपोर्ट अनुसार भदौ १० गतेदेखि १७ गतेभित्र २६ वटा वाणिज्य बैंकहरुको निक्षेप ११ अर्बले बढेर ४४ खर्ब ३७ अर्ब रुपैयाँ पुगेको हो ।

अघिल्लो दुई हप्ता बैंकिङ निक्षेपमा स्थिरता कायम हुँदै बैंकहरुको खातामा ४४ खर्ब २६ अर्ब रुपैयाँ जम्मा भएको थियो । यद्यपि, अघिल्लो हप्ता अर्थात् भदौ ३ गतेदेखि १० गतेभित्र बैंकहरुले दुई अर्बले कर्जा लगानी बढाएका थिए भने यस हप्ता ११ अर्बले निक्षेप बढ्दा पनि जम्मा १ अर्बले मात्र कर्जा लगानी वृद्धि गरेका छन् ।

संघको रिपोर्ट अनुसार अघिल्लो हप्ताको तुलनामा यस हप्ता बैंकहरुले १ अर्ब रुपैयाँले कर्जा बढाउँदै कुल ४१ खर्ब ८१ अर्ब रुपैयाँले लगानी गरेका छन् । यस्तो कर्जा लगानी बैंकहरुले भदौ ३ गतेसम्म ४१ खर्ब ७८ अर्ब र भदौ १० गतेसम्म ४१ खर्ब ८० अर्ब रुपैयाँ गरेका थिए । पछिल्लो समय बैंकहरुमा क्रमशः निक्षेप बढ्दै गएको छ ।

Related posts

तपाइलाइ कस्ताे लाग्याे ?