चैत्र १७,काठमाडौँ । कर्णाली प्रदेशका मुख्यमन्त्री राजकुमार शर्माले विश्वासको मत पाएका छन् । सत्तामा सहभागी दलमध्ये राष्ट्रिय प्रजातन्त्र पार्टीले समर्थन फिर्ता लिएपछि नेकपा माओवादी केन्द्रबाट मुख्यमन्त्री बनेका शर्माले दोस्रो पटक विश्वासको मत लिएका हुन् ।
आज शुक्रवार दिउँसो बसेको प्रदेश सभाको बैठकमा मुख्यमन्त्री शर्मालाई चार दलका ३८ जना सांसदले विश्वासको मत दिएका हुन् । मतदानमा सहभागी ३९ जना सांसदमध्ये मुख्यमन्त्री शर्माको पक्षमा ३८ मत परेको छ भने विपक्षमा एक मतमात्रै परेको छ । उनले राप्रपाबाहेक सबै दल र स्वतन्त्र सांसदको मत प्राप्त गरेका छन् ।
शर्मालाई नेपाली कांग्रेसका १४, नेकपा माओवादी केन्द्रका १३, नेकपा एमालेका नौ, नेकपा एकीकृत समाजवादी र स्वतन्त्रतर्फबाट एक÷एक जना सांसदले विश्वासको मत दिएका हुन् ।
यसअघि गएको पुस २७ गते शर्मा कर्णाली प्रदेशको तेस्रो मुख्यमन्त्रीमा नियुक्त भएका थिए । पुस १० गते एमालेसहितको गठबन्धन बन्दा एमाले, नेकपा माओवादी केन्द्र, राष्ट्रिय प्रजातन्त्र पार्टी र नेकपा एकीकृत समाजवादी केन्द्रका २५ जनाको सांसदको समर्थनमा शर्मा मुख्यमन्त्रीमा नियुक्त भएका थिए ।
