उत्तर कोरिया विश्वको ठूलो शक्ति बन्न सक्छ : ट्रम्प

फागुन १४, काठमाडौं । परमाणु हतियार त्यागेमा उत्तर कोरिया विश्वको शक्तिशाली अर्थतन्त्र बन्न सक्ने अमेरिकी राष्ट्रपति डोनाल्ड ट्रम्पले बताएका छन् ।

ट्वीटरमा अमेरिकी राष्ट्रपति ट्रम्पले लेखेका छन्, ‘उत्तर कोरियासँग तीव्र आर्थिक समुन्नति हाँसिल गर्ने सम्भावना र क्षमता छ र यस्तो क्षमता अरु कुनै देशको भन्दा बढी छ ।’

अमेरिकी विदेश मन्त्री माइक पोम्पेओले उत्तर कोरिया अझै पनि परमाणु खतराको कारण रहेको बताएको केही घण्टामै ट्रम्पको यस्तो भनाई आएको हो ।

Chairman Kim realizes, perhaps better than anyone else, that without nuclear weapons, his country could fast become one of the great economic powers anywhere in the World. Because of its location and people (and him), it has more potential for rapid growth than any other nation!

— Donald J. Trump (@realDonaldTrump) February 24, 2019

ट्रम्प र उत्तर कोरियाका नेता किम जोङ–उनबिच दोस्रो ऐतिहासिक वार्ता हुँदैछ । भियतनामको राजधानी हानोइमा बुधबार र बिहीबार हुने वार्ताको तयारी पूरा भएको जनाइएको छ । वार्ताका लागि उत्तर कोरियाका नेता किम आफ्ना प्रतिनिधिसहित रेल चढेर त्यसतर्फ प्रस्थान गरिसकेका छन् ।

दुई नेताबिच गएको वर्षको जुनमा सिंगापुरमा ऐतिहासिक भेटवार्ता भएको थियो । त्यो भेटमा उत्तर कोरिया आफ्नो परमाणु कार्यक्रम बन्द गर्न सहमत भएको थियो ।

भियतनाममा हुने दोस्रो वार्तामा पहिलो वार्तामा भएका सम्झौता कार्यान्वयनको समीक्षा हुने तथा नयाँ रणनीतिसहितको सम्झौता हुने सम्भावना छन् ।