दृष्टिआई केयर सेन्टर नवौँ बर्षमा प्रवेश, नयाँ प्रविधियुक्त कर्नियल क्रस लिंकिङ सेवा सुरु गर्ने घोषणा

बैशाख १५,काठमाडौँ । नेपालमा निजी क्षेत्रबाट सञ्चालित आँखा अस्पतालहरुमा सबैभन्दा ठूलो सञ्जाल भएको दृष्टिआई केयर सिस्टमद्वारा सञ्चालित दृष्टि आँखा अस्पताल कलकींले स्थापनाको आठौ बर्ष पुरा गरेको छ । अस्पतालले आठौ बार्षिकोत्सवको अवसरमा नयाँ प्रविधियुक्त कर्नियल क्रस लिंकिङ सेवा सुरु गर्ने घोषणा गरेको छ । आँखासम्बन्धी जनचेतना एवं गुणस्तरीय सेवा मार्फत सवैका लागि दृष्टि सधैका लागि दृष्टिको लक्ष्य हासिलमा प्राप्त भएको उपलब्धिलाई अस्पतालले गर्वका साथ स्मरण गरेको बताएको छ ।

स्थापनादेखि नै दृष्टिआई केयर सेन्टर, कलंकीले सर्वसुलभ रुपमा अत्याधुनिक प्रविधिको प्रयोगबाट गुणस्तरीय सेवा प्रदान गर्दै आईरहेको छ । विना सुई मोतिया विन्दुको शल्यक्रिया सेवाले बिरामीहरुलाई सहज,सुरक्षित र आरामदायी उपचार सुविधा उपलब्ध गराउन सफल भएको छ । आठौ बर्ष पुरा गरेको अवसरमा दृष्टिआई केयरले कर्नियल क्रस लिंकिङ सेवा सञ्चालनको थालनी गरेको छ । यो सेवा विशेष गरी केराटोकोनस तथा अन्य कर्नियल समस्या भएका बिरामीहरुका लागि अत्यन्त प्रभावकारी हुन्छ । कर्नियल क्रस लिंकिङले कर्नियालाई मजबुत बनाउने र रोगको नियन्त्रणका साथै दृष्टि संरक्षणमा महत्वपूर्ण भूमिका खेल्छ ।

दृष्टिआई केयर सिस्टम कलंकीका प्रमुख कार्यकारी अधिकृत डा. भाईराजा श्रेष्ठर्ले को सफल अनुभवले सर्वसुलभ रुपमा नविन प्रविधि र उच्चस्तरीय सेवामार्फत बिरामीहरुको आँखाको सुरक्षा र उपचारमा प्रतिबद्घ रहन प्रेरित गरेको बताए । डा. श्रेष्ठले विरामीप्रति समर्पित भएर नै दृष्टिआई केयर सिस्टम कलंकीले कर्नियल क्रस लिंकिङ सेवा सुरु गरिएको बताए ।

दृष्टिआई केयर सेन्टरका मेडिकल निर्देशक डा. सविता पालिखेले आगामी दिनमा सेवालाई अझ विस्तार गर्नुका साथै नयाँ प्रविधियुक्त रिफ्राक्टिक सर्जरी सेवा सुरु गरिने बताए । उनले अनुभवी र दक्ष चिकित्सकहरुको समूहबाट अत्याधुनिक प्रविधिका साथ आगामी दिनमा विरामीमुखी तथा गुणस्तरीय सेवा प्रदान गर्ने प्रतिबद्घता जनाए ।

आठौ बार्षिकोत्सबको अवसरमा दृष्टिआई केयर सेन्टरले सम्पूर्ण विरामी, शुभचिन्तकतथा सहयोगीहरु प्रतिहार्दिक आभार प्रकट गरेको छ ।