भाद्र १३, काठमाडौं । नेपाली कांग्रेसका सांसद गगन थापाले ललितपुरस्थित सडक विभागअगाडि धर्ना दिएका छन् ।
काठमाडौं क्षेत्र नम्बर–४ बाट निर्वाचित थापा शुक्रबार प्रदेश नम्बर–३ का सांसद र स्थानीयसहित धर्नाका लागि ललितपुरस्थित सडक विभाग पुगेका हुन् ।
काठमाडौंको कपन र चाबहिल सडकको ठेक्का अवधि सकिँदा पनि नबनाइएको भन्दै थापा धर्नामा उत्रेका हुन् ।
थापाको निर्वाचन क्षेत्रमा पर्ने ती दुवै सडकको जिम्मेवारी भने सैलुङ कन्स्ट्रक्सनले पाएको छ । सो क्षेत्रका १२ वटा सडक अलपत्र पारिएको थापाले बताए ।
स्थानीय नागरिकले चाबहिलमै धर्ना दिन भनेपनि आफू सांकेतिक विरोधका लागि सडक विभाग आएको भन्दै उनले एक हप्ताभित्र काम नभए सिंहदरबारमै भौतिक पूर्वाधार तथा यातायातमन्त्रीको कार्यकक्षमा धर्ना दिने चेतावनी दिए ।
चाबहिल, कपनलगायत काठमाडौं–४ का सडक निर्माणको कामको समयावधि गत वैशाखमै सकिएको जानकारी दिँदै थापाले यस अवधिमा जम्मा २० प्रतिशतमात्रै काम भएको बताए ।
काम नगर्ने यही कम्पनीलाई फेरि दुई वर्षको म्याद थप्न लागेकामा उनको आपत्ति थियो ।
यसअघि, थापाले क्षेत्र नम्बर–४ का सडक अलपत्र पार्ने ठेकेदारलाई कारबाहीको माग गर्दै सडक विभागमा पत्र पनि पठाएका थिए ।
‘कारबाही गर्नुको साटो कपन क्षेत्रमा खानेपानी आयोजनाको काम सडक अलपत्र पार्ने कम्पनीलाई दिनुको कारण के हो ?’ भन्दै उनले प्रश्न गरे ।
काम नगर्ने त्यही ठेकेदारलाई फेरि खानेपानीको काम दिइएकोमा उनले आपत्ति जनाए ।
सत्तारुढ दल नेकपाका अध्यक्ष पुष्पकमल दाहालका घरबेटी शारदाप्रसाद अधिकारी सैलुङ कन्स्ट्रक्सनका मालिक हुन् । यो कन्स्ट्रक्सनले त्रिपुरेश्वर र नगरकोट जाने सडक पनि अलपत्र छाडेको छ ।