दिपु बर्णवाल
असार ३,पर्सा । पर्साको बिन्दवासिनी गाउँपालिकामा अनेरास्ववियूका विद्यार्थी नेताहरुले गाउँपालिकाको बिरोधमा प्रदर्शन गरेका छन् । अखिल नेपाल राष्ट्रिय स्वतन्त्र विद्यार्थी यूनियन आवद्ध बिन्दवासिनिका नेता कार्यकर्ताहरुले गाउँपालिकाको बिरोधमा बुधवार प्रदर्शन गरेको हो ।
अनेरास्ववियुका केन्द्रिय सदस्य शिवम साहको नेतृत्वमा गाउँपालिकाले विश्वभरी फैलिएको कोरोना भाइरसको रोकथाम तथा नियन्त्रणमा लापरावही गरेको भन्दै बिरोध प्रदर्शन गरिएको हो । कोरोना भाइरसको रोकथाम तथा नियन्त्रणमा लापरवाही गर्दै अब्यवस्थित क्वारेन्टाईन, स्वास्थ्य सामाग्रीको अभाव, जनतालाई सास्ती लगायतका बाबजुत जनप्रतिनिधिहरुको बिलासीमा रमाईरहेको भन्दै विद्यार्थी नेताहरुले दवावस्वरुप ध्यानआकर्षण गरेका हुन् ।
गाउँपालिकाका अध्यक्ष र उपाध्यक्ष लगायतका जनप्रतिनिधिहरु यस्तो विषम परिस्थितीमा पनि भ्रष्टाचार र बिलासितामा रमाएर जनताको समस्याहरुको सुनुवाई नगरेको त्याँहाका स्थानियको गुनासो छ । कृषकहरुको समस्यालाई सम्बोधन नगरेर गाउँपालिकाकी उपाध्यक्ष महिनामा ४–५ पटक कार्यालय आएपनि मासिक रुपमा १ लाख सवारी खर्च उठाएको भन्दै विद्यार्थी नेताहरुले आपत्ति जनाएका हुन् ।
अनेरास्ववियुका विद्यार्थी नेताहरुले गाउँपालिकाको तथ्यांक पार्दर्शि गर, भ्रष्ट उप प्रमुखलाई कार्वाही गर, भ्रष्ट जनप्रतिनिधि मुर्दावाद लगायतका नारा अंकित प्ले कार्ड सहित नाराबाजी गरेका थिए । गाउँपालिकाकी उपाध्यक्ष किरण देवी गुप्ताले स्वयम आफुले मासिक रुपमा १ लाख सवारी खर्च लिएको स्वीकार गरेकी छिन् । आन्दोलनको क्रममा विद्यार्थी नेताहरुले गाउँपालिकाको तथ्यांक पारदर्शी गर्न १ हप्ते अल्टिमेटम समेत दिएको आन्दोलनका नेतृत्व गरीरहेका अनेरास्ववियूका केन्द्रिय सदस्य शिवम साहले बताए।
साथै एक हप्ता भित्र स्पष्टिकरण नदिए थप आन्दोलनका कार्यक्रम सार्वजनिक गर्ने पनि उनले बताए । आन्दोलनमा कल्सरिफ गद्धी, सुधिर कुमार पण्डित, रामबाबु मण्डल लगायतका विद्यार्थि नेताहरुको उपस्थिती रहेको थियो ।
