सिक्टा सिँचाइ आयोजनाः बदमासी गर्नेलाई कारबाहीको तयारी

असोज ८,बाँके । सरकारले राष्ट्रिय गौरवको सिक्टा सिँचाइ आयोजनामा बदमासी गर्ने जो–कोहीलाई पनि कानुनी कारबाहीको दायरामा ल्याउने भएको छ ।

आयोजनाको नहर परीक्षणकाक्रममा नै भत्किएपछि सरकारले गठन गरेको छानबिन समितिको प्रतिवेदनका आधारमा दोषी देखिएका जो–कोहीलाई पनि कारबाही गर्ने तयारी गरिएको हो ।

ऊर्जा, जलस्रोत तथा सिँचाइ मन्त्रालयले सहसचिव सुशीलचन्द्र तिवारीको संयोजकत्वमा छानबिन समिति गठन गरेको थियो ।

सो छानबिन समितिले स्थलगत अध्ययन गरी आयोजनामा भएको बदमासी तथा खराबीकाबारेमा अध्ययन गरेको थियो ।

ऊर्जा, जलस्रोत तथा सिँचाइमन्त्री वर्षमान पुनले आयोजनामा देखिएको समस्याकाबारेमा छानबिन गर्न गठित समितिको प्रतिवेदनका आधारमा दोषी देखिए निर्माण व्यवसायी, परामर्शदाता तथा आयोजना प्रमुखलाईसमेत कारबाहीको दायरामा ल्याइने जानकारी दिए ।

बाँकेको ४२ हजार हेक्टर कृषियोग्य जमिनमा भरपर्दो सिँचाइ सुविधा उपलब्ध गराउने लक्ष्यका साथ सरकारले सो आयोजना निर्माण गरिरहेको छ ।

निर्माणकाक्रममा रहेको सो आयोजनाको पश्चिम मूल नहरको अधिकांश काम सम्पन्न भएपछि निर्माण व्यवसायीले नहर परीक्षण गर्दा भत्कन पुगेको थियो । हाल सो आयोजनाको भौतिक निर्माणकार्य ५५ प्रतिशत सम्पन्न भएको छ ।