कामदार जान थालेको १६ वर्षपछि मलेसियासँग आज श्रम सम्झौता हुँदै

कात्तिक १२, काठमाडौं । कामदार जान थालेको १६ वर्षपछि मलेसियासँग आज श्रम सम्झौता हुँदैछ ।सन् २००२ बाटै नेपाली रोजगारीका लागि मलेसिया जाने गरेको भएपनि श्रम सम्झौता भएको थिएन ।

श्रम सम्झौतामा हस्ताक्षर गर्नका लागि मलेसियाका मानव संसाधन मन्त्री एम कुला सेगरन आइतबार राति नेपाल आइसकेका छन् । सोमबार १० बजेदेखि मन्त्रीस्तरीय बैठक बस्दैछ । बैठक सकिएपछि मलेसियाका मानव संसाधन मन्त्री एम. कुला सेगरन र नेपालका तर्फबाट श्रममन्त्री गोकर्ण विष्टले हस्ताक्षर गर्नेछन् । त्यस लगतै पत्रकार सम्मेलन गरेर सार्वजनिक गरिंदैछ । नेपालका तर्फबाट श्रम सम्झौता गर्न श्रम मन्त्री विष्टलाई आइतबारको मन्त्रीपरिषद बैठकले स्विकृति दिइसकेको छ।

पटक–पटक प्रयास गर्दा पनि नभएको सम्झौता नेपाली कामदार पठाउनै रोकिएपछि मलेसियाले चासो दिएको हो । गत जेठ २ गतेदेखि मलेसिया कामदार पठाउन बन्द गरिएको छ ।

मलेसिया जाने कामदार ठगिएको भन्दै श्रम रोजगार तथा सामाजिक सुरक्षा मन्त्री गोकर्ण विष्टले कामदार पठाउने प्रक्रियामा संलग्न विभिन्न संस्थानै खारेज गर्ने निर्णय गरेका थिए । मन्त्री विष्टको एकतर्फि निर्णयसँगै मलेसिया जाने प्रक्रिया अवरुद्ध भएको थियो ।

प्रमुख मध्यको एक मानव श्रोतको देश नेपालले कामदार रोकेपछि मलेसिया त्यसको सन्देस राम्रो नजाने र रोजगारदाताको पनि चासो बढेपछि जसरी पनि नेपाली कामदार लैजान तयार भएको हो ।

निर्णय भएको लामो समयसम्म कार्यन्वयन नभएको सूून्य लागत कार्यन्वयन गरेर नेपाली कामदार लैजान मलेसिया तयार भएको सम्झौतालाई अन्तिमरुप दिने नेपाली अधिकरीले दाबी गरेका छन् ।

यद्यपी सम्झौताको खाका नेपालमा भने अहिलेसम्म बाहिरिएको छैन ।

ड्राफ्टलाई अन्तिम रुप दिएका अधिकारीका अनुसार नेपाली कामदारले स्वदेशमा गरिने विमा, कल्याण्कारी शुल्क बाहेक कुनै पनि शुल्क तिर्नु पर्ने छैन । म्यानपवार कम्पनीलाई कामदारले पाउने १५ दिनको तलव बराबर रोजगारदाताले नै दिने र प्रत्येक दुुई वर्षमा आउने-जाने हवाई टिकट समेत रोजगारदाताले नै उपलब्ध गराउनुु पर्नेछ । स्वदेशमा गरिने स्वास्थ्य परीक्षणको शुल्क यहाँ कामदारले तिरेपनि मलेसियामा पहिलो महिनाको तलवसँगै फिर्ता पाउने छन् ।

मलेसियामा कामदार पठाउने कार्यमा संलग्न संस्था नेपालले खारेज गरेपनि अब कसरी पठाउने भन्ने प्रक्रिया आजै बन्ने प्राविधिक समितिले टुंगो लगाउने छ।

रोकिएको मलेसियाको रोजगारी खुल्न भने केही समय लाग्ने छ।