कार्तिक १९, काठमाडौं । वेस्ट इन्डिज टी–ट्वान्टी विश्वकप क्रिकेटको पहिलो चरणबाटै बाहिरिएको छ । बिहीबारको खेलमा वेस्ट इन्डिज श्रीलंकासँग २० रनले पराजित हुँदा प्रतियोगिताबाट बाहिरिएको हो ।
सन् २०१६ को विश्वकप क्रिकेटको उपाधि जित्न सफल वेस्ट इन्डिज पहिलो चरणबाटै बाहिरिएको हो । शेख जायद क्रिकेट स्टेडियममा श्रीलंकाले दिएको १९० रनको लक्ष्य वेस्ट इन्डिजले निर्धारित २० ओभरमा ८ विकेट गुमाएर मात्र १६९ रन बनायो ।
वेस्ट इन्डिजका लागि सिमरन हेटमायरले ८१ रनको अर्धशतकीय पारी खेले । ५४ बल खेलेका उनले ८ चौका र ४ छक्का प्रहार गरे । त्यस्तै निकोलश पुरानले ४६ रनको योगदान गरे । वेस्ट इन्डिजका लागि त्यसबाहेकका ब्याटरले दोहोरो रन जोड्न सकेनन् ।
यसअघि टस हारेर पहिले ब्याटिङ गरेको श्रीलंकाले निर्धारित २० ओभरमा ३ विकेट गुमाएर १८९ रन बनायो । श्रीलंकाका लागि चारिथा अशलंकाले ६८ रनको अर्धशतकीय पारी खेले । ४१ बल खेलेका उनले ८ चौका र १ छक्का प्रहार गरे । त्यस्तै ४१ बल खेलेका पाथुम निशंकाले ५ चौकाको सहयोगमा ५१ रनको अर्धशतकीय पारी खेले ।
बलिङतर्फ वेस्ट इन्डिजका लागि आन्द्रे रशलले दुई विकेट लिए । त्यस्तै डेवेन ब्राभोले एक विकेट लिए ।
जितसँगै श्रीलंकाले प्रतियोगिताको शुखद अन्त्य गरेको छ । सुपर १२ मा ५ खेल खेलेको श्रीलंकाले ४ अंक जोडेर तालिकाको चौथो स्थानमा रह्यो । शीर्ष स्थानमा रहेको इग्ल्यान्डको ४ खेलबाट ८ अंक जोडेको छ । पराजित वेस्ट इन्डिजले ४ खेलबाट २ अंक जोडेको छ ।
