मंसिर २३, काठमाडौं । नेपाल स्टक एक्सचेञ्ज (नेप्से) ले बिहीवार दुई कम्पनीको शेयर मूल्य समायोजन गरेको छ । नेप्सेले स्वाभिमान लघुवित्त वित्तीय संस्था लिमिटेड र आइसिएफसि फाइनान्स लिमिटेडको बोनस शेयरको मूल्य समायोजन गरेको छ ।
नेप्सेले स्वाभिमान लघुवित्तको ३२.३० प्रतिशत बोनस शेयरको समायोजनपछि शेयरमूल्य रू. १ हजार ९१९.८८ तोकेको छ । कम्पनीको अघिल्लो कारोबारको दिन कायम अन्तिम शेयरमूल्य रू. २ हजार ५४० रहेको थियो ।
स्वाभिमान लघुवित्तले ३२.३० प्रतिशत बोनस शेयर र कर प्रयोजनका लागि १.७० प्रतिशत नगद लाभांश गरी कुल ३४ प्रतिशत लाभांश प्रस्ताव गरेको छ । उक्त प्रस्ताव पारितका लागि स्वाभिमान लघुवित्तले पुस ८ गते वार्षिक साधारण सभा बोलाएको छ ।
त्यस्तै, नेप्सेले आइसिएफसि फाइनान्सको १० प्रतिशत बोनस शेयरको समायोजनपछि शेयरमूल्य रू. ६३९.८२ तोकेको छ ।
कम्पनीको बुधवार रू. ७३०.८० मा अन्तिम कारोबार भएको थियो ।
आइसिएफसि फाइनान्सले वर्ष गत वर्षको मुनाफाबाट १४ प्रतिशत लाभांश प्रस्ताव गरेको छ । कम्पनी १० प्रतिशत बोनस शेयर र कर प्रयोजनका लागि समेत ४ प्रतिशत नगद लाभांश वितरणको प्रस्ताव गरेको हो ।
उक्त प्रस्ताव पारितका लागि आइसिएफसि फाइनान्सले पुस ५ गते वार्षिक साधारण सभा बोलाएको छ । कम्पनीले सभा र लाभांश प्रयोजनका लागि आज (बिहीवार) देखि सभा हुने दिनसम्म बुक क्लोज गर्ने भएको हो ।
दुवै कम्पनीले लाभांश तथा साधारण सभा प्रयोजनार्थ बिहीवार बुकक्लोज गरेसँगै नेप्सेले शेयरमूल्य समायोजन गरेको हो ।
