चैत १०, काठमाडौं । घरेलु टोली दक्षिण अफ्रिकाविरुद्धको एक दिवसीय क्रिकेट शृङ्खला बंगलादेशले जितेको छ । तेस्रो तथा अन्तिम खेलमा अफ्रिकामाथि ९ विकेटको जित निकाल्दै बंगलादेशले शृंखला २–१ ले जितेको हो ।
यससँगै बंगलादेशले पहिलो पटक दक्षिण अफ्रिकी भूमिमा एक दिवसीय शृङखला जित्दै ऐतिहासिक सफलता हासिल गरेको छ ।
१५५ रनको मध्यम लक्ष्य बंगलादेशले २६ दशमलव ३ ओभरमा मात्र एक विकेट गुमाएर भेट्टाएको हो । उसका लागि कप्तान तामिम इकबालले अविजित ८७ रनको अर्धशतकीय पाली खेले ।
त्यस्तै लिट्टोन दासले ४८ रन जोड्दा शाकिब अल हसन १८ रनमा नटआउट रहे । अफ्रिकाका केशव महाराजले एकमात्र विकेट लिए ।
यसअघि टस जितेर ब्याटिङ गरेको अफ्रिका ३७ ओभरमा १५४ रनमा अलआउट भएको थियो। उसका लागि जानेमन मालनले ३९, केशव महाराजले २८ तथा ड्वाने प्रेटोरियसले २० रन जोडे ।
बलिङमा बंगलादेशका तास्किन अहमेदले ५ तथा शकिब अल हसनले २ विकेट लिए। बंगलादेशले पहिलो खेल ३८ रनले जित्दा दक्षिण अफ्रिकाले दोस्रो खेल ७ विकेटले जितेको थियो ।