चैत २८, बाँके । नेपालगञ्जको बिपी चोक नजिक कारले ठक्कर दिँदा तीनजना पैदलयात्रीको मृत्यु भएको छ । आइतवार राति प्रदेश ३–०१–२३ च ८४८१ नम्बरको कारले ठक्कर दिएको जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक हिमालय शाहले जानकारी दिए ।
कारको ठक्करबाट नेपालगञ्ज उपमहानगरपालिका(११ का ६५ वर्षीया समिना इद्रिसी, पाँच वर्षीय कसिम इद्रिसी र अलि इद्रिसीको मृत्यु भएको प्रहरी निरीक्षक शाहले जानकारी दिए । सडकमा हिँडिरहेका तीनै जनालाई कारले ठक्कर दिँदा गम्भीर घाइते भएका थिए ।
उनीहरुलाई त्यहीँ कारमा राखेर चालकले नै शिक्षण अस्पताल नेपालगञ्ज पुर्याएका थिए । अस्पताल पुर्याइएको १५ मिनेटपछि उनीहरुलाई चिकित्सकले मृत घोषणा गरेको प्रहरी निरीक्षक शाहले बताए ।
प्रहरीले कार चालक नेपालगञ्ज उपमहानगरपालिका–१० का २८ वर्षीय इन्द्रबहादुर थापालाई नियन्त्रणमा लिएको छ।