रास्वपाको विधान परिमार्जन गर्न ११ सदस्यीय कार्यदल गठन

साउन १०, काठमाडौँ । राष्ट्रिय स्वतन्त्र पार्टीले विधान परिमार्जन गर्न ११ सदस्यीय विधान संशोधन सुझाव कार्यदल गठन गरेको छ ।
पार्टी केन्द्रीय कार्यालय वनस्थलीमा बसेको बैठक कार्यवाहक महामन्त्री कविन्द्र बुर्लाकोटीको संयोजकत्वमा सोविता गौतम, गणेश कार्की, डा। तोषिमा कार्की, क्रान्तिशिखा धिताल, डा। नारायण घिमिरे, विजय जैरु, मेघ आले, कामिनी चौधरी, पुकार बम र शंकर श्रेष्ठ रहेको समिति बनाउने निर्णय गरेको हो ।

कार्यदललाई सुझाव प्रतिवेदन तयार ९० दिनको समय दिइएको कार्यबहाक प्रवक्ता मनिष झाले जानकारी दिए ।
बैठकले अभियान विभागको नेतृत्व गरिरहेका पार्टी सहमहामन्त्री विपिन आचार्यको नेतृत्वमा कर्णालीमा विशेष अभियान सञ्चालन गर्ने निर्णय गरेको छ ।

कर्णाली विशेष अभियान भाद्र दोस्रो सप्ताहदेखि शुरुवात हुनेछ । पार्टीका विचार मन्थन गर्न, क्षमता अभिवृद्धिमा काम गर्न, रणनीतिमा अझै धेरै छलफल आवश्यक ठानेर पार्टीको क्लोज क्याम्प गर्ने र त्यसको नेतृत्व पार्टी सभापति रवि लामिछानेले गर्नेछन् ।

#विधान परिमार्जन