आठौँ राष्ट्रिय खेलकूदका लागि खेलाडी छनोट

चैत ४, काठमाडौँ । आठौँ राष्ट्रिय खेलकूद प्रतियोगिताका लागि प्रदेश नं ३ बाट जिम्न्याष्टिक खेलाडी छनोट भएका छन् ।

समान ६–६ पुरुष/महिला गरी १२ खेलाडी छनोट भएको प्रदेश ३ खेलकूद परिषद्का कार्यालय प्रमुख लीलाराम बस्नेतले जानकारी दिए । छनोट हुने पुरुष खेलाडी भक्तपुरका उज्ज्वल तिवारी, त्रिदेव गिरी, सत्यनारायण मानन्धर, मनीष भैल र विवेक पौन तथा काठमाडौँका पिजः महर्जन रहेका छन् ।

त्यस्तै महिलामा तारा शिवाकोटी, जेनिशा थापा, प्रकृति थापा मगर, शौभाग्य कोजु, सविक्षा सुवाल र रिजु रञ्जित छन् । शौभाग्य र रिजु ललितपुरका हुन् भने बाँकी पाँचै खेलाडी भक्तपुरका हुन् ।

सुटिङः महिला एयर राइफलमा सुस्मिता नेपाल र जुनु घिसिङ तथा एयर पेस्तोलमा सङ्गीता गुरुङ कार्की र रुविना श्रेष्ठ छनोट भए । पुरुष एयर राइफलमा कृष्ण घोरासैनी र दीपक थापा तथा एयर पेस्तोलमा विपेश खड्का र उत्कर्ष थापा छानिए ।

करातेः पुरुषतर्फ ५० केजीमा काभ्रेका साजन मोक्तान, ५५ केजीमा सिन्धुपाल्चोकका विजय श्रेष्ठ, ६० केजीमा रामेछापका फिन्चोक दोर्जे लामा, ६७ केजीमा मकवानपुरका आशिष थापा, ७५ केजीमा चितवनका किशोर लामा, ८४ केजीमुनि चितवनका रमेश तामाङ र ८४ केजीमाथि ललितपुरका विपिनराज सिंह छनोट भए । पुरुष एकल कातामा ललितपुरका युनोज महर्जन तथा टिममा रामेछापका विमल मगर, दीक्षित थापा र आदर्श लामा छानिए ।

महिला ४५ केजीमा काभ्रेकी मीना ब्लोन, ५० केजीमा नुवाकोटकी सविना श्रेष्ठ, ५५ केजीमा दोलखाकी रोजिता ढुङ्गेल, ६१ केजीमा काभ्रेकी सुनिता ब्लोन, ६८ केजीमुनि काभ्रेकी निरुपा तामाङ र ६८ केजीमाथि काठमाडौँकी कृशा शेर्पाले राष्ट्रिय खेलकूदमा प्रतिस्पर्धा गर्नेछन् । कृषा एकल कातामा सफल भइन् । महिला टिम कातामा ललितपुरका मीरा खाती, रेश्मा सुनुवार र रुजा कालीकोटे छनोट भए ।