धुनिबेशीको महेशनारायण गुफा र झ्याम्पल झरनाले पदयात्रीको मनै लोभ्यायो

माघ १६,धादिङ । धुनिबेशी नगरपालिका वडा न १ र २ मा रहेका कृषि, धार्मिक तथा ऐतिहासिक पर्यटन र विकासलाई प्रबर्दन गर्ने उद्देश्यका साथ विभिन्न धार्मिक स्थलको अवलोकन तथा पदयात्रा कार्यक्रम सम्पन्न भएको छ ।

बुधबार धुनिबेशी नगरपालिका वडा नम्बर १ र २ भित्र रहेका बच्छलादेवि मन्दिर, अनन्त नारायण मन्दिर, महेशनारायण गुफा, दमदमे गाँउ, झ्याम्पल झरना, गैरिगाउँ, चिलाउँनेगाउँ लगायतको क्षेत्र अवलोकन गरिएको छ । समृद्ध धादिङ अभियान अन्तर्गत सो पदयात्रा तथा अवलोकन भ्रमण राखिएको युवा नेता तथा समाजसेवी कुमार पाण्डेले अनलाइनकेन्द्रलाई बताए । उनले सो अभियान आउने दिनहरुमा पनि गरिने जानकारी दिए ।

धुनिवेशी नगरपालिकाका प्रमुख बालकृष्ण आचार्यले खासगरी धुनिवेशी १ मा रहेको पर्यटकिय क्षेत्रको सम्भावना र गर्न सकिने प्रयासहरुका विषयमा थप अध्ययन गर्नपनि पदयात्राले सहयोग पुर्याउने बताए । आचार्यले धुनिवेशीमा लाखौँ आन्तरिक पर्यटकलाई यहाँको रमणिय क्षेत्र र पर्यटकिय गञ्तव्यका विषयमा जानकारी र प्रचार गर्न सकिए सम्मृद्ध नगरपालिकाको परिकल्पनालाई थप टेवा पुग्ने बताए ।

धुनिवेशी नगरपालिका १ का वडा अध्यक्ष मानबहादुर तामाङले वडाका पर्यटकिय गञ्तव्यको प्रचार गर्ने उदेश्यले सो पदयात्रा आयोजना गरिएको बताए । उनले १ नम्बर वडामा पर्यटकलाई आर्कषित गर्न थुप्रै गञ्तव्य रहेकोले सबैले प्रचार गर्नुपर्नेमा जोड दिए । उनले महेशनारायण गुफा र झ्याम्पल झरनाको प्रचारमा सहयोग गर्न सबैलाई आग्रह गरे ।

पदयात्रा कार्यक्रममा नगर प्रमुख बालकृष्ण आचार्य, वडाध्यक्ष मान बहादुर तामाङ, समाजसेवी कुमार प्रसाद पाण्डे, बिनोद राज पाण्डे,डा.रामहरि लामिछाने,सुवास खतिवडा,माधव गजुरेल, लगायत करिव ५० जनाको सहभागिता रहेको थियो।