भारत-पाकिस्तान द्वन्द्व: पाकिस्तानी सेनाले भन्यो-‘आत्मरक्षाका लागि भारतीय लडाकु विमान खसाल्यौँ’

फागुन १६,काठमाडौँ । आफ्नो वायुसीमामा प्रवेश गरेका दुईवटा भारतीय लडाकु विमानलाई बुधवार बिहानै खसालेको दाबी गरेको पाकिस्तानले त्यसलाई ‘आत्मरक्षाका लागि चालिएको’ कदम भनेको छ।

केही बेरअघि पत्रकार सम्मेलन गर्दै पाकिस्तानी सेनाका प्रवक्ता मेजर जनरल आसिफ गफूरले पाकिस्तानले आफ्नो ‘क्षमता र सामर्थ्य देखाउन’ उक्त कदम चालिएको बताए।

तर उनले भारतीय विमान खसालिएको घटनालाई भारतलाई जवाफी कारबाही गरेको रूपमा व्याख्या गरेनन्।

उनले भने, ‘यो हामीले हाम्रो क्षमता छ भन्ने देखाएको पक्का हो। तर यो जवाफी कारबाही होइन।’

भारतले मङ्गलवार पाकिस्तानी भूभागमा प्रवेश गरी पुलवामा हमला गराएको भनिएको एउटा सशस्त्र समूहको तालिम केन्द्रमा हमला गरेको दाबी गरेको थियो। त्यसलाई उसले ‘गैरसैनिक कारबाही’ भनेको थियो।

पाकिस्तानी सेनाका प्रवक्ताले आफ्नो क्षमता देखाउन ६ वटा ‘टार्गेट चयन गरेर तिनलाई लक गरिएको’ बताएका छन्।

उनका अनुसार नियन्त्रण रेखा पार गर्ने दुईवटा विमानलाई पाकिस्तानले खसालेको छ।

त्यसमध्ये एउटा पाकिस्तानतर्फ र अर्को भारततर्फ नै खसेको उनले बताए।

पाकिस्तानतर्फ खसेको विमानका दुईजना चालकमध्ये एकजना घाइते भएकाले उनको उपचार भइरहेको र अर्का पनि आफ्नो नियन्त्रणमा रहेको पाकिस्तानको दाबी छ।

पत्रकार सम्मेलनमा खसालिएको विमानमा भेटिएका भन्दै केही कागजपत्र र हतियार समेत देखाइएको थियो।