संसदमा बजेट पेश हुँदै, १७ खर्ब हाराहारीको बजेट आउने

जेठ १५,काठमाडौँ । सरकारले आज आउँदो आर्थिक वर्ष २०७९/०८० को लागि बजेट सार्वजनिक गर्दैछ । जेठ १५ गते संसद्का दुवै सदनमा बजेट पेस गर्नुपर्ने संवैधानिक व्यवस्था छ ।

अर्थमन्त्री जनार्दन शर्माले दिउँसो चार बजे आर्थिक वर्ष २०७९/८० को राजश्व र व्यायको वार्षिक अनुमान सार्वजनिक गर्न लागेका हुन् । प्रतिनिधि सभाको हिजो बसेको दोस्रो बैठकमा सभामुख अग्निप्रसाद सापकोटाले अर्थमन्त्री शर्माले प्रस्तुत गर्ने आउँदो आर्थिक वर्षको बजेटको समय तालिका घोषणा गरेका हुन्।

सरकारले जेठ १० गते सङ्घीय संसद्को संयुक्त बैठकमा पेस गरेको नीति तथा कार्यक्रम बहुमतले पारित भइसकेको छ । देशको अर्थतन्त्र जोखिमपूर्ण अवस्थाबाट गुज्रिरहेको अवस्थामा आउन लागेको बजेटलाई चासोका साथ हेरिएको छ । तर सरकारले आसन्न सङ्घीय र प्रादेशिक चुनाव लक्षित मतदाता रिझाउने गरी महत्वाकाङ्क्षी बजेट ल्याउने तयारी गरेको छ । बजेट १७ खर्ब हाराहारीको बनिरहेको अर्थमन्त्रालयका अधिकारीले बताएका छन् ।

चालु आर्थिक वर्षका लागि १६ खर्ब ३२ अर्ब रुपैयाँको बजेट आएको थियो । तर अर्धवार्षिक समीक्षाबाट आकार घटाउँदै १५ खर्ब ४६ अर्ब रुपैयाँको बनाइएको थियो । बजेटमा सामाजिक सुरक्षा, कर्मचारीको तलब वृद्धि, करका दर परिवर्तन, आयकर छुट, भन्सार छुट, पेट्रोलियम पदार्थमा १० रुपैयाँ कर कटौतीलगायतका कार्यक्रम समेटिने आकलन गरिएको छ । अन्तर्राष्ट्रिय बजारमा इन्धनको भाउ बढ्दोक्रममा रहेकाले चौतर्फी मूल्यवृद्धिमा असर परेको छ ।

स्रोत र खर्च क्षमतालाई केन्द्रमा राखेर कार्यान्वयनमुखी बजेट ल्याउन विज्ञले सुझाव दिएका छन् । मूल्यवृद्धि नियन्त्रण गर्ने र उपभोक्तालाई राहत पुग्ने कार्यक्रम ल्याउन र ती कार्यक्रमको कार्यान्वयन पक्षमा ध्यान दिन पनि उनीहरुको जोड छ ।

Related posts

तपाइलाइ कस्ताे लाग्याे ?